公務員事務局局長接受商業電台節目訪問發言全文
公務員事務局局長王永平今日（七月八日）上午就落實公務員減薪，接受商業電台節目＜風波裡的茶杯＞訪問發言全文如下：(只有中文)
局長：其實我致電給你們是正想澄清，我看到有些報章有些標題，我一定要澄清，我完全沒有說過，上街的公務員是小部分，或者是沒有代表性，完全沒有這些貶詞。昨天我在公務員遊行完畢後發表的言論，完全在公務員事務局的網站，每一個字都寫了出來。
主持：不如請你講多一次。
局長：我講多一次，基本上我講幾點。第一點，公務員上街，而上街非常有秩序、非常平和，我感到十分欣慰。
主持：這應該是意料中事，不應大驚小怪。
局長：這當然是一件好事。當然我們完全期望公務員和平及溫和上街，但由於人數的確不少，我其實都擔心會不會期間有些我們估計不到的意外，結果能夠順利完成，對此我表示欣慰。第二點我要講清楚，公務員充分透過上街遊行這個渠道表達了意見，政府會繼續同代表他們的工會溝通，繼續不斷解釋政府立法減薪這個迫不得已的立場。
至於講到人數的問題，有很多記者不斷問我有關人數的問題，我說人數的多少，我當然不評論，因為公務員選擇上街遊行示威，當然是他們的權利，我們完全尊重，但亦有公務員工會和公務員沒有選擇這樣做。
很可惜，有傳媒將這說話歪曲成我指責上街遊行的人是一小撮，沒有代表性。我要鄭重聲明，我完全沒有這個意思，公務員上街遊行完全是他們的權利，他們有代表性。
主持：是這樣就最好了，局長。
局長：當然有代表性，點解無代表性呢？它們這麼多工會，當然它們代表它們的會員啦，係咪？所以我覺得我們一定要分清楚，我好擔心，傳媒這樣的報道，會挑起另外一些不必要的「拗撬」。
主持：報道就真係．．．．
主持：不過奇怪，呢份(報紙)一直都是好支持政府．．．．
主持：咁其實真係唔知點解咁不幸，你講的說話給報紙歪曲了，有些報紙仲用來做標題，就話一小撮人，無代表性。
局長：是的，我的說話全都已經上網了。
主持：咁其實，即係你沒有質疑他們的代表性，亦沒有質疑數目的多寡。
局長：無，絕對無。
主持：其實我都想問你，昨日星期日，好多人都放假，其實好多公務員都上班，香港大約有十八萬公務員左右，你估昨日有幾多人需要上班呢？
局長：昨日需要上班的人數，一時間我答你唔到。
主持：我諗都有幾萬人啦。
局長：我就相信應該係大部分公務員也不需上班。
主持：紀律部隊全日都當值。
局長：文職的便不用上班。
主持：紀律部隊呀，緊急服務呀．．．
王永平：是呀，是呀。
主持：咁都有幾萬人啦。
局長：可能有都未定，的確我無統計數字。
主持：有些人上班便不可以上街，還有一些高級的也不能上街。唔好講數字啦，你也不著重這些東西。但你剛才說到一樣東西，報紙今日又賣，就是政府不理有多少人上街，星期三一定會拿去立法會進行二讀審議立法減薪的議案，咁你剛才又說，你會不斷繼續溝通，咁溝通有乜用呢？都已有預設答案。
局長：大班，我沒有說過，我不理有多少人上街，這樣可能又會給傳媒話我們好似完全唔講道理。其實我們只不過是話，我們今次立法減薪，是要填補法律漏洞，令我們今年的減薪決定，可以妥當執行，這是迫不得已的；所以，這個決定我們繼續要去做。當然，我們會繼續與同事解釋。
主持：這是不是一個最好的決定呢？有法律界人士指出，若你擔心訴訟的話，比如現在發問卷給每一個公務員，要他們簽一樣東西，就是是否接受減薪，如不接受便遣散，這就解決這個問題，為何又沒有考慮到這個問題呢？
局長：我們甚麼方案都考慮過，包括你剛說的方案，即是說你一係接受減薪，如果你唔接受，我們就遣散你。但我們覺得這樣的話，將對公務員體制帶來更大的衝擊，公務員是長期聘用的，我們政府是沒有權，除非公務員犯了很嚴重的錯誤，我們是沒權「炒」一個公務員的。
主持：唔係，佢接受遣散，因為佢唔接受減薪。
局長：咁又變了，我又覺得這樣的的確確好嚴重影響我們公務員與政府的長期僱傭關係。
主持：咁立法就無影響僱傭關係？
局長：係呀，呢樣真係會，比起減薪更加重要好多倍。
主持：不如給昨日攪上街這位幕後黑手，梁籌庭講講，公務員工會聯合會主席梁籌庭。
梁籌庭：你又唔好講到我咁衰。
主持：我們直情叫黑手。
梁籌庭：對著幹。
主持：對著幹，哈哈．．．．
局長：「對著幹」這些說話又是報紙講？。
梁籌庭：其實依家就算我唔講，都俾你老人家抹黑啦。
局長：我完全冇抹黑你，梁生。
主持：梁籌庭不如你講講佢點樣抹黑你。
梁籌庭：唔好咁講。
主持：即係起碼給他一個機會澄清。
梁籌庭：喂大佬啊，你睇睇你之前兩日講過些甚麼．．．唔係只是我一個話你，其實昨日上街的同事都係咁話，若果沒有王生那些言論的話，我都唔會行出來。
主持：咁你應該多謝王永平喎，大佬。
梁籌庭：係啊。
局長：係喇呢個．．．
主持：你唔多．．．
梁籌庭：王局長．．．咁高級．．．
局長：都受到困擾的．．．
局長：即係我講的說話是希望我們的同事，不要採取一些過激的行動．．．
梁籌庭：咁你又唔好講到我們變了人民公敵呀！
局長：我完全沒有說過這句說話。
梁籌庭：係咪？大佬，無限上綱的人唔係我們啊，我發覺好似係你將我們幻想上綱。
局長：我完全沒有說過你剛才所說的說話，我們現在每次說話，都盡可能上載公務員事務局的網頁，希望大家可以看到．．．
梁籌庭：我們現在員工要求多些面對面的溝通，大家多對話好過多發信，信就根本唔係一般公務員都睇到的，唔係個個都有網站的．．．
局長：你要見我隨時都可以．．．
梁籌庭：我想同你溝通，我好主動約你的。
局長：想見我的時候，我立刻安排。
主持：梁籌庭，局長有冇避過你先？
梁籌庭：問題就係話，局長，我們就每一個問題同你商討時，就拿番目前減薪這件事，我都好主動同你傾，但係你好清楚的訊息就係話，你立場就係咁，立法減薪就係既定政策，乜都唔改得，我又冇屈你，當時我真係同你講，關上門大家「成班友」坐在一起，大家搞掂佢啊，好過搞到大家現在咁僵，大家要落台的。
局長：關上門都不能處理法律問題，我希望．．．
梁籌庭：喂大哥．．．你同我講，你出去話俾人聽無奈接受咪得囉．．．你即係叫我出去死。
局長：不是，我希望你理解．．．我們要解決的是法律問題，不同法律，不同律師，有不同意見，但我們的政府律師最高層都去倫敦，問過第三者意見，我們的確是要解決這個法律問題，所以，有時到某一個階段的時候，是如何去傾談呢，都是不能解所謂法律問題，希望你都諒解．．．
梁籌庭：法律還法律，法律都不外乎人情，你仲有個仲裁機制．．．
局長：其他方面．．．．
梁籌庭：你咪開動個仲裁機制囉，如果到時有公務員或者個別公務員唔肯，係要告政府，你拎返上去立法會，邊個反對啊？
局長：那．．．
梁籌庭：係咪啊？全體立法會議員一致通過，我們公務員團體亦都唔出一句聲。
局長：因為如果你話要等人控告我們輸掉，然後我們再去．．．
主持：梁籌庭．．．
主持：咁就俾其他人話輸打贏要喇。
局長：就產生不穩定呢，都會很擔心．．．
梁籌庭：而家個社會好穩咩？咁搞法，我唔覺得喎。
局長：．．．昨日我都多謝你們，你們昨日們表現非常好．．．
梁籌庭：．．．我開始的時候已經話你聽，我們公務員係有秩序的，唔會在遊行裡面搞事的。其實我們九九年都做過一次啦，那次兩萬六千人上街，咪秩序井然？其實我、你放心，我們公務員只係出來表達對政府的不滿，唔會挑起市民對我們的不滿。
局長：好多謝梁籌庭．．．
梁籌庭：即係你又唔好挑剔我們的市民．．．
局長：你放心，我會繼續隨時隨地和你們工會溝通。
梁籌庭：溝通就應該的，大家都想溝通。
局長：這樣，就是透過那麼多人聽到，我希望大家，特別你的工會同事，有時看到我們的傳媒標題，的確要先弄清楚，然後才回應。我現在真的很擔心那些標題，是完全反映不到實實在在我說過的東西。
主持：我今日看到報紙，就不知真或假，剛才局長就澄清了，他沒有說報紙的東西。有報紙說你(梁籌庭)太太因為你參與工會，弄至不能升級，接著上司和他說，如果你要升級的話就要和梁籌庭離婚，是不是真有此事呢？
梁籌庭：你講到這些好私人的事．．．
主持：但係報紙賣了出來喎．．．我而家發現公務員好「過癮」。你們一見到上司，在上司面前呢，其實公務員的制度真係幾好，你真係馴到好似隻貓咁，你可唔可以暫時當你係工會代表，要「砌」至得。你一見到王永平，王永平一出聲就大佬前大佬後，咁你點同佢拗啊？我真係好尊重呢個公務員制度，真係好分尊卑。換轉係李卓人，見到個僱主咁客氣，僱主就一天都光哂。
梁籌庭：我講俾你聽，這些咪叫職業操守囉。
主持：甚麼職業操守、職業病呢，你要爭取權益，應該要佢收聲啊嘛。
梁籌庭：我諗這些就係公務員的習慣啊。
主持：訓練真係幾好喎，訓練得你們幾馴喎，話ｓｉｔ就ｓｉｔ，話ｗａｌｋ就ｗａｌｋ。
梁籌庭：咁唔得，呢樣就唔可以。
主持：即係而家叫你唔好上街你就唔好上街。
梁籌庭：咁我冇聽佢講啊，依家我唔上街咩？
主持：咁你又唔爭？你躺係度好似隻死狗咁有乜辦法？。
梁籌庭：我相信我們又唔會這樣做，我亦都唔會做。
主持：不如大家澄清，一個又唔想講私事，一個就報紙所有的標題、所講的都唔認數喇。
梁籌庭：唔會唔認數，好似我．．．
主持：我講王永平啊，唔係講你啊。
局長：可以上網看。
主持：你唔使幫你上司王永平話唔認數。
局長：多謝你啊鄭大班。
主持：多謝兩位，家事都係適宜關上房門傾。
局長：希望有機會再見梁籌庭。
二○○二年七月八日（星期一）